真實個案分享

透過個案分享鼓勵同路人一起挽手，樂觀積極地面對困難

歡迎不育不孕人士分享生育經驗

我想分享


  • 黏連影響了生育

    黏連影響了生育

    2018年5月24日

    我自小已經很喜歡小朋友，希望結婚之後有一個完整的家庭，怎料原來事情並不如想像中簡單⋯⋯
    某年的一天，我肚突然劇痛難當，因為我家住近北區醫院，所以我二話不說就往那裡求醫。直覺上我認為是子宮附近位置發痛，但當時醫生替我照腸等地方後發現不到致痛問題，開了一些止痛藥給我便離開。我休息了一天，劇痛沒有減退，媽媽見到我痛得面色發青，便著我再看醫生，今次我去了屯門醫院。因已有前科，我便跟醫院講出情況，一看之下，醫生說我情況非常危急，如果一個小時之內不動手術便有生命危險！！原來我的腹膜內有很多血塊，再仔細檢查後，發現我左邊輸卵管有一個很大的水囊穿了，更流血不止，要即時動手術止血！最後我給輸了四包血，拾回了性命，而肚子上就多了一條打直的長長疤痕。
    *************************************************
    其實我向來都有進行一般性的婦科檢查及個人身體檢查，但並不深入。約兩年後，我感覺子宮附近開始有點不對勁，月經來時特別肚痛，擔心會否又出現毛病，於是去了法國醫院求診。醫生檢查後發現子宮附近有一個瘤，還長得很大，有機會隨時爆裂，而且上面有一點點白色影，怕是癌症之類的問題⋯⋯因此醫生即時轉介我到專科醫生看急症⋯⋯
    原來左邊卵巢位置長了一個拳頭般大的朱古力瘤，還壓著子宮，今次又要動手術把它切除，而我左邊的輸卵管亦不能倖免！幸好化驗後沒有癌細胞。醫生解釋，可能兩年前的手術處理得不好，使子宮內產生了不少黏連問題，導致翻發，雖然他已盡力處理，還是叮囑我以後動任何手術都要先跟醫生說清楚情況⋯⋯
    *************************************************
     
    我當時已婚，很想生BB組織家庭，醫生認為我還算年輕（我當時30歲），提議我先試服排卵藥，可惜試了半年，甚麼動靜也沒有⋯⋯
    我是當護膚品專櫃銷售員的，一天，聽到另一專櫃的女同事同樣有生育問題，試了數年未能成功，往檢查又找不到不育原因，最後她進行了IUI，成功誕下BB。這位女同事介紹了她的主診醫生給我，我亦開始自己上網查看輔助生育技術的資料，那時候，我對輔助生育技術的知識十分貧乏，只知道有一個便宜的IUI，約兩萬多元，及一個昂貴的IVF，要最少十萬元⋯⋯
     
    我跟這位醫生道出自己的情況及問題，醫生了解後，認為我的 黏連問題已經阻塞了輸卵管的通道，所以不適合做IUI，要直接做IVF。基於費用昂貴，醫生著我與丈夫商量後才決定下一步的做法。雖然我當時尚算年輕（31歲），不過就是因為還年輕，做IVF的成功機會可高一點，否則再等下去，一年又一年很快便成為高齡產婦，年紀越大，問題又會越多呢！我返家後第一時間與老公商量費用問題，想要生BB就需要花錢，而且使了十多萬又未必一次過成功，一定要有這樣的心理準備！！
     
    幸好老公非常支持，我們商量好一同負擔輔助生育的費用，所以就抱著希望進行IVF。
    經過詳細檢查，我們一步步按照醫生的專業指示進行IVF療程。療程期間，每一步都在擔心與壓力下度過，好像最初每日都要替自己打排卵針，的確有點害怕，第一次試過由老公操刀但不成功，最後都是自己頂硬上⋯⋯最後發現，打針最緊要快，便不怕痛⋯⋯
     
    我平日的工作壓力已非常大，還要做IVF療程，很擔心自己應付不來。幸好得到上司的體諒（她本身也進行過輔助生育療程），我可以在放胎後的兩星期等著床時間放無薪假期，那時我真的留在家中盡量少走動，後來驗孕見到棒上淡淡的一劃，自己未敢肯定，經過醫生檢查後，確定今次真的成功懷孕了！幸運地我們第一次就成功了！
    回想這段生育路，你說不緊張才怪，懷孕前擔心不能成孕，懷孕後又憂慮胎兒的健康，每次進行檢驗就好像要過一個關卡般，又驚又喜。幸好期間丈夫及身邊朋友的支持與開解，自己又樂觀一點，日子才過得輕鬆一點。
     
    兩個月前，BB女出世了，出世時差不多七磅重，而且非常精靈可愛。
    因為進行IVF關係，我還有三顆雪胎，我們會待身體回復狀態後再放一次胎，希望可以生到第二個BB，不過都要順其自然、一切隨緣。
  • 事業女性要生B

    事業女性要生B

    2018年3月22日

    我而家已經係一位幸福嘅雙職媽媽，有一對可愛嘅蛇Twins喇！
     
    其實我係一個好事業型嘅女性，咩都工作行先，而且做事都係目標為本，決定咗我就一定會向前行，直至達到目的為止。我當初點解會考慮去做輔助生育？
    因為時間就係金錢！
     
    其實我哋喺生BB方面冇乜壓力，雙方父母亦無催生BB，我同丈夫都認為教養孩童要付出好多時間、心機同金錢，原本我哋都冇打算生兒育女。不過，記得當時就快到龍年，我身邊好多朋友都話要生龍B，我就係為咗趕上車，想試下生番個⋯⋯
     
    但係我當時已經超過37歲，要懷孕都已經係高齡產婦。為咗想快D達到我哋嘅目標，我同老公一齊商量好，決定唔花時間去睇中醫調理身體、做運動強健體格咁，盡快去搵醫生檢查，做人工受孕，希望盡快成功啦！
    最初仲諗住自己兩公婆生活好健康，應該都順利啦！點知生BB原來唔係想像中咁簡單，就算有輔助都唔係一次就可以搞掂⋯⋯
     
    我睇咗兩個醫生，最後同醫生商量過我嘅情況後，認為我都適合進行試管嬰兒療程，所以好快我就開始呢個療程。
    整個療程其實好緊密，每一日都要跟足醫生指示去打排卵針，做足三個星期，除咗要受皮肉之痛外，真係消耗咗我唔少耐力和耐性。不過我心諗呢一切都係我自己選擇要做嘅，咁就唯有面對，盡量增加自己嘅正能量。當時我係有繼續返工嘅，好在做療程嘅地點同我工作嘅地方好近，而且醫生同姑娘又好配合到我返工嘅時間，所以整個過程都算順利，對我嘅工作冇大影響。不過⋯⋯
     
    越心急越難懷孕，做一次唔得要做第二次、第二次唔得又要做第三次，嗰種心急同焦慮嘅心情，實在好難用一兩句說話嚟形容。不過我都冇諗過放棄，因為「不到黃河心不死」嘛⋯⋯況且我哋兩夫婦之間有共識，要一齊面對困難。呢種Support好緊要，因為療程期間，又要打針又要食藥，對在職嘅我嚟講實在係好困擾同辛苦呢！
    最後我哋用咗接近兩年嘅時間就成功生咗對孖B啦！
     
    我覺得生BB都要好多嘢配合，好似就算我做試管嬰兒療程，都唔係一take過，當中都承受咗唔少壓力。可能自己本身係天主教徒，所以都相信生B要等上天安排。過程中樂觀D、正面D、保持心境開朗，咁待孕日子又容易過一D。另外，我好好彩，搵到同自己夾嘅醫生，佢哋又肯遷就我嘅返工時間，仲有當時上司嘅體諒同支持，等我可以喺療程安排上更順暢，減少好多工作同生B嘅衝突。
     
    其實對事業女性嚟講，生BB先好定唔生好？實在好難有一個肯定嘅答案。不過，我認真想同每一對希望生小朋友嘅夫婦講，養育一個小朋友唔只係考慮金錢咁簡單，仲要時間、心機同埋多方面嘅配合。我覺得最緊要夫婦之間一定要有共識，要放上時間、精神同金錢，共同面對一切困難，雙職爸媽就更加需要有呢個準備，因為陪伴一個小朋友成長嘅過程係要付出好多好多嘅。
     
    希望大家都做好生育計劃，順利生B！

  • 2018年3月1日

    我前一排見番一個十幾年冇見嘅朋友，佢而家有兩個小朋友，忽然記起十年前我結婚嘅時候，佢係大住肚嚟飲我個餐。但係點解佢而家大仔都只係讀緊小一？

    一問之下先知道⋯⋯原來佢嗰時個肚去到八個月嘅時候，bb嘅心跳突然之間停咗， 當時佢哋兩公婆經歷過傷痛之後，就諗住再努力、再懷孕！ 點知道到第二次大肚，個bb一出世冇幾耐，幾分鐘之後就夭折，聽到呢度⋯⋯身為媽咪嘅我都真係忍唔住喊咗出嚟。

    懷胎十月仲有聽到bb喺個肚裏面郁動，嗰種感覺其實係好溫馨，而且係同bb有好親密嘅感覺，出世嘅時候就更加帶來希望。 點會估到呢一份希望，只可以維持幾分鐘。

    好彩我朋友兩公婆佢哋有宗教信仰，所以佢哋嘅心情都比較上容易平復番。 後來佢哋去睇醫生，經過醫生診斷之後， 先知道原來係兩公婆之間嘅基因問題。喺醫生建議之下，佢哋用咗基因篩查嘅方法，選擇咗健康嘅胚胎再次懷孕，就成功生咗而家兩個健康嘅寶貝，所以都驚嘆現今科技可以真係為想生bb嘅夫婦帶來希望。

  • 2018年2月8日

    2015年懷孕，BB無長大自然流產；2016年再度懷孕，BB無心跳，8周用藥流；繼而去年同樣8周都無心跳，亦是藥流⋯⋯每次懷孕都會「流啡」，初時醫生認為黃體不足，最近一次原以為打黃體可以保B，但還是不能成功⋯⋯

    本人有宗教信仰，現十分矛盾，想做IVF，因為我倆都好鍾意小朋友，但發現卵巢功能指數開始擲界，很擔心有無可能成功，有甚麼方法可以保住卵子質素去做IVF?

    3次經歷，令我有種心理壓力⋯⋯

  • 2018年2月22日

    我畢業之後就到一家設有國內工廠的公司裡工作，負責接洽國內的客人和國內生產的。 我一向對每件事都盡心盡力，而且是個責任心比較重的人，所以工作也令我忙透。之後亦因為有不少同事離職，而我的工作就越來越大壓力了。

    而大約在兩年前，在我32歲的時候，我和丈夫就開始計劃生育，然而，這份比較忙碌的工作真的不能配合我們的所想，所以最後我決定了辭職， 休養身體，準備生bb。

    誰知生育計劃並不是我們想像中那麼容易，而事實是更加難掌控。 以為自己已經準備好，但又偏偏每次落空。最大問題又難受的是在我這個年紀沒有工作、休養生息，所有親戚朋友也會想我是準備生bb。有時候，他們本是出於好意，問候我們的狀況等等， 但有時他們的一個眼神對我們來說也是一種無形的壓力，而且心裏也不好過。 每一次我也只好勉強說現在是休養身體的時候，所有事情遲一步再說，更有一些親戚不識趣，又會一再追問下去，我也只好說一切順其自然吧！

    因為我又不能衝口而出，說其實我已經期待已久，只是不行又不是想像中那麼容易呢！

    現在，已經過了一年， 我們亦已經試過兩次IUI，卻是未能成功。 於是我們希望在35歲之前嘗試IVF，下個月就是我們療程的新開始，希望一切順利⋯⋯